ឆ្លងចរន្តអគ្គីសនី ឆេះផ្ទះអ្នកភូមិផ្អើលទាំងកណ្តាលយប់

ភ្នំពេញ​៖​ ផ្ទះអ្នកភូមិមួយល្វែង ត្រូវបានរងការខូចខាត ខណៈឆ្លងចរន្តអគ្គីសនីផ្ទុះឆេះយ៉ាងសន្ធោសន្ធៅ​ បង្កការភ្ញាក់ផ្អេីលដល់អ្នកជិតខាង និងសមត្ថកិច្ចកាលពីវេលាម៉ោង ១២ នឹង ៣០នាទីរំលងអាធ្រាត្រ ឈានចូលថ្ងៃទី ២៥ ខែ មិថុនា​ ឆ្នាំ ២០១៩​ នៅភូមិក្បាលដំរី ២​ សង្កាត់កាកាបទី២​ ខណ្ឌពោធិ៍សែនជ័យ​។

តាមប្រភពព័ត៌មានពីកន្លែងកេីតហេតុបានឲ្យដឹងថា​ ផ្ទះដែលឆាបឆេះខាងលេីជាផ្ទះលក់ដូរចាប់ហួយ នៅ​មុនពេលកេីតហេតុគេបានឃេីញអណ្តាតភ្លេីងបានឆាបឆេះ ចេញពីក្នុងផ្ទះជាន់ក្រោម ដោយម្ចាស់បាននាំគ្នាសម្រាកនៅជាន់លេី ភ្លាមនោះក៏ឃេីញម្ចាស់ផ្ទះលោតចុះពីលេីផ្ទះមក ទេីបមានការឆោឡោឡេីង និងរាយការណ៍ទៅសមត្ថកិច្ចចុះមកអន្តរាគមន៍ ហៅរថយន្តពន្លតអគ្គីភ័យចំនួន ៤គ្រឿង មកបាញ់ពន្លត់។

ក្នុងហេតុការណ៍ខាងលេីនេះផងដែរ សមត្ថកិច្ចបញ្ជាក់ថា បណ្តាលមកពីឆ្លងចរន្តអគ្គីសនី ទេីបមានការឆាបឆេះបែបនេះ​ និងប្រេីប្រាស់ទឹកអស់ចំនួន ៤ រថយន្ត អគ្គីភ័យក៏រលត់ទាំងស្រុង និងរងការខូចខាតសំភារៈមួយចំនួនផងដែរ តែមិនមានមនុស្សរងរបួសនោះទេ។